Hisia za Mwinyikayoka katika Sanaa

SAMAHANI KWA USUMBUFU

2011-12-27T07:26:00.000-08:00

KWAKO MGENI ULIYEKUWA UKIITEMBELEA BLOGU HII. SIKUWEZA KUTIA CHOCHOTE HUMU KWA ZAIDI YA MWAKA MZIMA SASA KUTOKANA NA SABABU AMBAZO HAZIKUWEZA KUZUILIKA. SASA NINARUDI TENA NA MUDA MFUPI UJAO (TUKIJAALIWA TAREHE 01.01.2012) UTAWEZA KUIONA BLOGU YAKO KATIKA MAMBO MAPYA KABISA.
ASANTE KWA KUNIVUMILIA NA KILA LA KHERI!

UCHAGUZI MLANGONI!

2010-10-27T09:58:00.000-07:00

KAMA ILIVYO KWA WATANZANIA WENGINE, WASANII PIA WANA HAKI YA KUPIGA KURA. SANAA INATUWEZESHA KUJUA AHADI HEWA NA ZILE ZINAZOTEKELEZEKA.

MSANII KUWA MACHO SIKU HIYO

HAKIKISHA HUCHAGUI PUMBA!

KUWA TAYARI OCTOBER 31, 2010

WATAZAMAJI

2010-08-18T08:19:00.000-07:00

MKUCHIKA ANATAFAKARI

2010-08-18T08:14:00.000-07:00

KING KIKI

2010-08-18T08:11:00.000-07:00

KAMA CHINA

2010-08-18T08:08:00.001-07:00

HISIA TROUPE

2010-08-18T08:01:00.000-07:00

WASANII MWINAMILA

2010-08-18T07:58:00.000-07:00

MPIGA NGOMA

2010-08-18T07:53:00.000-07:00

BASI LETU

2010-08-18T07:49:00.000-07:00

MWANAHARAKATI KAZINI

2010-08-18T07:41:00.000-07:00

SHADA GROUP KAZINI

2010-08-18T07:25:00.000-07:00

Umuhimu wa kujisajili

2008-06-10T08:48:00.000-07:00

Wasanii wengi wa Tanzania hufanya shughuli za sanaa bila ya kusajiliwa na baraza la sanaa la taifa BASATA. Mimi si mpiga debe wa BASATA lakini ningependa kuwaeleza kuwa kwa mujibu wa sheria za usajili za BASATA ambazo ziliidhinishwa mnamo mwaka 1984 ni kosa kujishughulisha na shughuli za sanaa hapa Tanzania bila kusajiliwa kihalali.
Mnaweza kufikiri usajili ni jambo dogo lakini umuhimu wa kujisajili hutokea pale unapotaka kuwasiliana na wafadhili mbalimbali. Jambo la kwanza watataka kuthibitisha kama umesajiliwa ili kujua uhalali wako. Halafu unaweza kupata mwaliko nje ya nchi au kupata wageni wa shughuli kama zako. Amini usiamini jambo kuu litakaloulizwa ni usajili wako.
Hebu niambie umeenda zako yuropa au hata hizi nchi zetu tunazoambiwa kila siku kuwa maskini ili ufanye onesho mara wenye nchi yao wanatokea na kutaka kuiona viza. Unawaonesha, wanataka pasipoti nayo unawaonesha, hee mara wanataka uthibitisho kutoka chama au taasisi ya nchi yako inayothibitisha uhalali wako……….. Du utawachania mistari au kunengua kidogo ili wakutambue? Shauri yako!
Kingine ambacho pengine hukijui au unakijua lakini unakifumbia macho ni kwamba “sheria haitambui kama huitambui”. Usije kusema jamani hilo sikulifahamu.
Hili nimependa kulisisitiza baada ya msanii fulani maarufu [jina ninalihifadhi] kushangaa sana nilipomwambia kuwa anayefanya kazi za sanaa bila usajili ni mwizi kama yule anayevunja na kuiba. Shauri yenu mimi nimeshasema
Asalaam alaykum

Mzee Mwinamila

2008-06-09T03:15:00.000-07:00

Naamini maelfu ya watanzania hasa wale ambao miaka ya themanini mlikuwa wafuatiliaji wa sanaa za maonesho hususani ngoma za asili mnamkumbuka marehemu mzee Mwinamila. Huyu mzee alikuwa ni mahiri mno katika kuimba na kucheza ngoma za kiasili hasa ile ngoma iitwayo hiyari ya moyo [sasa hivi Hiyari ya moyo ni jina la kikundi chake].
Huyu mzee alikuwa matata sana katika sanaa lakini kubwa lililonishawishi kumwandika pamoja na umahiri wake ni ule wimbo wake ambao katikati alichomekea maneno yasemayo “Twaimba nyimbo…twaimba nyimbo mwisho wake “tutakufwa lofwa” [hapa alikuwa na maana tutakufa lofa]. Ubeti huo huwa unaniacha hoi kila nikiwatazama wasanii na wanamuziki wa Tanzania.
Utakuta anavuuma na kutamkwa kila sehemu [huwezi kuamini wengine hutajwa hata katika nyumba za ibada], lakini baada ya hapo jiiiiiiiiiiiiiiii. Anakufa masikini. Ni umaskini wa kujitakia! Nasema ni umaskini wa kujitakia kwa sababu wakati wa kuvuma kwao hupata pesa nyingi na kuendekeza starehe na vitu vya anasa badala ya kujenga maisha yao. Matokeo yake baada ya muda chali.
Unawakuta wakipiga watu mizinga kwenye mabaa huku wakileta stori zao zilizopitwa na wakati. "Oooh enzi zangu niliimba sana……..mara enzi zetu sanaa ilikuwa juu" na majigambo kedekede. Sasa ole wako umsikilize- mwisho wa kujisifia lazima atakupiga mzinga.
Wasanii wa nyakati hizi jifunzeni kupitia makosa ya wenzenu, shauri yenu msije “kufwa lofwa”

Godwin Kaduma

2008-06-08T02:44:00.000-07:00

Godwin Kaduma:Taa iliyozimika!

Na.Shaaban Mwinyikayoka

Hatimaye mwenyezi mungu amevuna alichopanda tangu mwaka 1935.Hatimaye kisima kilichotegemewa na wasanii wa Tanzania katika kuchota hekima,ushauri na busara kimekauka na hatimaye sauti nzito na isiyotetereka ya mwanamapinduzi mwenye msimamo katika medani ya sanaa Afrika imenyamaza.
Mzee Godwin Zelaoneka Kaduma ametutoka dunia.
Sina tofauti kubwa na wengi katika kumfahamu nguli huyo wa sanaa nchini.Ni kama wengine ,nilimfahamu mzee Kaduma kupitia sanaa kule Bagamoyo.Tukiwa wasanii kumi tuliokuwa tukihudhuria warsha ya mbinu za uigizaji,tulitambulishwa kuwa mzee Kaduma ndiye katibu wa Tanzania Theatre Centre [TzTC],taasisi ya sanaa iliyokuwa ikiwezesha warsha hiyo.Afisa habari wa TzTC wa wakati huo bwana Kasibi Muungano ndiye aliyefanya utambulisho huo.
Baadaye nilikutana tena na mzee Kaduma katika warsha ya uandishi wa tamthilia ambayo iliongozwa na profesa Amandina Lihamba huku mzee Kaduma akiwa mhariri wetu.Na hakuwa mhariri tu wa tamthilia bali pia alishiriki kuigiza michezo mbalimbali ya kuigiza ukiwemo ulioitwa “Harusi ya Mariam” ambao ulivuma mnamo miaka ya themanini.Kwa upande mwingine aliongoza michezo mingi ya kuigiza ukiwemo “Mashetani” uliotungwa na profesa Ibrahim Hussein.Michezo mingine ni “Mwinyi” na “Dhamana na mabatini” ambayo ilikuwa ni utunzi wake.
Msanii gani nguli wa leo hususani anayejishughulisha na sanaa za maonesho ambaye hajapitia katika mikono ya mzee Kaduma?Ni vigumu kuamini lakini mzee Kaduma alikuwa ni kiongozi na mshauri wa asasi mbalimbali za kisanii duniani na hasa kusini mwa jangwa la sahara ikiwemo taasisi ya sanaa mashariki mwa Afrika EATI.Miongoni mwa nyadhifa zilizompa jeuri ya kujivunia kazi yake ya sanaa ni kuwapika wasanii wa sanaa mbalimbali akiwa mkuu wa chuo cha sanaa Bagamoyo,mhadhiri wa chuo kikuu cha D’salaam,mkurugenzi wa sanaa,katibu mtendaji wa TzTC,mjumbe wa bodi ya mfuko wa utamaduni na mwenyekiti wa bodi ya chama cha hakimiliki nchini [COSOTA].
Wakati fulani tukiwa katika warsha mojawapo za mfuko wa utamaduni,wajumbe walipigwa na butwaa kutokana na ubunifu wa hali ya juu wa mzee Kaduma katika uwasilishaji wa sanaa kwani mchezo wa “Mwinyi”ambao wajumbe walipelekewa ulihusisha waigizaji wawili tu na wengine kadhaa wasioonekana.
Uzalendo!
Mzee Kaduma alilipenda mno taifa na alijivunia utanzania wake।Mfano wa hayo ni pale alipokuwa akiwaaga wasanii wa kundi la sanaa la Sisi Tambala ambao walikwenda nyumbani kwake Bagamoyo kumuaga kabla ya safari ya kuelekea nchini China kulikokuwa na tamasha la sanaa।Kwa mujibu wa mwenyekiti wa mfuko wa utamaduni Tanzania mama Marie Cidossa,mzee Kaduma aliwasihi wasanii wa Sisi Tambala wakauenzi na kujivunia utanzania wao na warudi wakiwa watanzania.Mfano mwingine ni shairi lake lililoitwa “Nipeni bendera” ambapo aliisifia nchi yetu na kuanika rasilimali zake.Hakika alikuwa mwanaharakati wa utalii wa ndani na nje ya nchi yetu.
Mshauri!
Ili kitu kiweze kufanikiwa kunahitajika ushauri wa ushauri wenye kufaa.Katibu mtendaji wa mfuko wa utamaduni Tanzania mama Rose Sayore aliwahi kudiriki kumtaja mzee Kaduma kwa jina la “Toboa tobo wa sanaa” akimfananisha na mganga wa kienyeji-hakika mzee Kaduma aliifahamu vyema tiba ya sanaa.
Hapa ndipo uwezo wangu wa kumwelezea mzee Kaduma unapofika ukingoni kwani siwezi kumwelezea zaidi bali nasema nami nimepata doa kubwa la kisanii kutokana na kifo cha mwanaharakati huyo kwani wiki moja kabla ya kulazwa katika hospitali ya Muhimbili ambako hakurudi tena mpaka mauti yalipomkuta,tulikuwa pamoja kule nyumbani kwake Bagamoyo akimalizia kuihariri tamthilia yangu ambapo alinisihi kutumia lugha zenye uwazi na zinazokubalika katika jamii na kunitaka nipeleke miswada yangu mingine naye angeihariri bure kama ambavyo ilivyokuwa katika muswada huo.Pia aliitumia nafasi hiyo kunionesha ukumbi mdogo kando ya nyumba yake ambao kama angejaaliwa kupona basi angeutumia kuendeshea darasa la sanaa kwa wasanii ambao hawajabahatika kupata mafunzo rasmi na wale ambao wangependa kujiendeleza.Ndoto ile imefifia na sijui ni nani atautumia ukumbi ule kwa kumuenzi mpiganaji yule.
Kwa hakika pengo la mzee Kaduma litazibika kwani hakuwa mchoyo wa elimu kwa aliowafundisha lakini atakayeziba pengo hilo hawezi kuwa kama mzee Godwin Zelaoneka Kaduma.
“Mlango umefunguka
Kaduma umeingia
Upeo waleta shaka
Kwa wanaofuatia
Ndege ‘tashindwa kuruka
Mafuta umeondoa
Nenda ufike haraka
Nyumba kutuandalia
Kiduo tutakiruka
Huko tukifuatia
Jenga la kuimarika
Jukwaa la kuvutia
Kama si sero mangaka
Ngoma tutajivunia
Taa iliyozimika
Kaduma twakulilia”

Hisia zangu katika sanaa

2008-03-29T06:33:00.000-07:00

Wapendwa wasomaji wa kijiwe hiki kipya, napenda kuchukua nafasi hii kuwakaribisha saana katika dimba langu hili ambako nitakuwa nikimwaga hisia zangu kuhusiana na masuala mbalimbali yenye kuhusiana na sanaa katika eneo ninaloishi, nchini mwangu na hata nje ya mipaka ya nchi hii.

Nikiwa mmoja wa wasanii wa utunzi wa hadithi/riwaya, michezo ya kuigiza pamoja na kucheza tamthilia, naamini kuwa dimba hili litakuwa ni sehemu muafaka kwetu sisi (mimi, wewe msomaji pamoja na wasanii wenzangu), kukutana na kubadilishana mawili matatu kwa lengo la kuinua na kuboresha sanaa katika nchi yetu.

Ikiwa Marekani, sanaa ni miongoni mwa sekta muhimu zenye kuliingizia taifa hilo pato, kwanini ishindikane Tanzania? Kwanini ishindikane, wakati wasanii tena wenye vipaji vya hali ya juu wapo?

Naam, ni maswali hayo na mengine kadhaa ambayo naamini kuwa kupitia dimba hili la hisia zangu katika sanaa, tutaweza kuyajadili na kuhakikisha muktadha mzuri kwa sanaa katika taifa letu.

KARIBUNI